ராஜஸ்தான் சட்டப்பேரவையில் மொத்தமுள்ள  200 உறுப்பினர்களில் 109 காங்கிரஸ் உறுப்பினர்களின் ஆதரவைப் பெற்றிருக்கிற காங்கிரஸ் முதலமைச்சர் அசோக் கெலாட்டின் கோரிக்கையை ஏற்று சட்டமன்றத்தை கூட்ட பா.ஜ.க. ஆளுநர் தயாராக இல்லை. அதேபோல, சட்டமன்ற காங்கிரஸ் கூட்டத்திற்கு வராமல் புறக்கணித்த சச்சின் பைலட் ஆதரவு 19 காங்கிரஸ் உறுப்பினர்கள் மீது கட்சித்தாவல் தடைச் சட்டத்தின் கீழ் நடவடிக்கை எடுக்க வேண்டுமென சட்டமன்ற காங்கிரஸ் கொறடா கோரிக்கை விடுத்திருந்தார். ஆனால் ராஜஸ்தான் மாநில உயர்நீதிமன்றம் சபாநாயகர் முடிவு எடுப்பதற்கு தடை விதித்திருக்கிறது. உச்சநீதிமன்றமும் தடையை நீக்க முன் வரவில்லை. இந்நிலையில்  பெரும்பான்மை ஆதரவைப் பெற்ற கெலாட் ஆளுநர் மாளிகை முன்பாக சட்டமன்ற உறுப்பினர்களுடன்  தர்ணா  நடத்தவேண்டிய அவசியம் ஏற்பட்டிருக்கிறது.

கர்நாடக மாநிலத்தில் தொடங்கி மத்திய பிரதேசத்தில் நடைமுறைப்படுத்திய ஆட்சிக் கவிழ்ப்பு வேலையை ராஜஸ்தானில் நிகழத்த பா.ஜ.க.வுடன் சேர்ந்து ஆளுநர் சதித் திட்டம் தீட்டுகிறார். பெரும்பான்மை ஆதரவை நிரூபிக்க சட்டமன்றத்தை கூட்ட வேண்டுமென்ற கோரிக்கையை ஆளுநர் ஏற்க மறுப்பதன் மூலம் அங்கே ஜனநாயகம் குழி தோண்டி புதைக்கப்பட்டிருக்கிறது. ‘பேய் ஆட்சி செய்தால் பிணம் தின்னும் சாத்திரங்கள்’ என்று பாரதி பாடியதற்கேற்ப,  மோடி ஆட்சி செய்கிறார்; ஜனநாயகம் நாள்தோறும் படுகொலை செய்யப்பட்டு வருகிறது. இதை தடுத்து நிறுத்த நீதிமன்றங்கள் முன்வராதது மிகுந்த வேதனையை தருகிறது.

தொடக்க வேளாண்மை கூட்டுறவு சங்க பணியாளர்கள் வேலை நிறுத்தம் செய்வது ஏன்?

மத்திய கூட்டுறவு வங்கி கிளைகளில் மிரர் அக்கவுண்ட் தொடங்கி அதன் மூலமே விவசாயிகளுக்கு கடன் வழங்க வேண்டும் என்ற முறையை கைவிட்டு மீண்டும் தொடக்க வேளாண் கூட்டுறவு கடன் சங்கம் மூலமே கடன் வழங்க அனுமதிக்க வேண்டும் என்ற கோரிக்கையை வலியுறுத்தி வேலை நிறுத்தம் நடைபெற்று வருகிறது. சம்பா சாகுபடி நடைபெற்று வரும் இந்த சமயத்தில் பணியாளர்கள் போராட்டம் நடத்தியதால் விவசாயிகளுக்கு உரம் விநியோகத்திற்கு தடை ஏற்பட்டிருக்கிறது. இதற்குரிய நடவடிக்கைகளை தமிழக அரசு எடுக்க வேண்டும்.

குறு, சிறு  தொழில்களின் கோரிக்கையை பா.ஜ.க. அரசு ஏற்க முன் வருமா?

குறுந்தொழிலுக்கு ரூபாய் 25 லட்சமும், சிறு தொழிலுக்கு ரூபாய் 5 கோடியும் முதலீடாக நிர்ணயிக்கப்பட்டிருந்தது. தற்போது ரூபாய் 50 கோடி வரையிலான உற்பத்தியை சிறு தொழிலாகவும், ரூபாய் 250 கோடி உற்பத்தி செய்யும் நிறுவனங்களை நடுத்தர  நிறுவனங்கள் என்றும் புதிதாக பா.ஜ.க. அரசு அறிவித்துள்ளது. கள நிலவரத்திற்கு எதிரான இத்தகைய அறிவிப்புகள் குறு,சிறு,  நடுத்தர தொழில்களின் அடையாளங்களை முற்றிலும் அழித்துவிடும். குறுந்தொழில்களுக்கு ரூபாய் ஒரு கோடி முதலீடு, சிறு தொழிலுக்கு ரூபாய் 5 கோடி முதலீடு, நடுத்தர தொழிலுக்கு ரூபாய் 25 லட்சம் முதலீடு என மறுவரையறை செய்ய வேண்டுமென கோவை தொழில் அமைப்புகளின் கூட்டமைப்பு வலியுத்தியுள்ளது.

ஏற்கனவே கொரோனா தொற்று காரணமாக குறு, சிறு, நடுத்தர தொழில்கள் நலிந்த நிலையில் இருக்கும் போது பா.ஜ.க. அரசின் அறிவிப்பு மேலும் கடுமையான பாதிப்புகளையே உருவாக்கும். தொழில் முனைவோரின் கோரிக்கையை மத்திய அரசு ஏற்குமா?

கொரோனா நோயாளிகளை கையாள்வதில் தமிழக சுகாதாரத் துறைக்கும், சென்னை மாநகராட்சிக்கும் இடையே போதிய ஒருங்கிணைப்பு உள்ளதா என்கிற கேள்வியை சென்னை உயர்நீதிமன்றம் எழுப்பியது ஏன்?

ஏற்கனவே சென்னை மாநகராட்சியில் மரணமடைந்த 444 பேரின் எண்ணிக்கையை தமிழக சுகாதாரத் துறை கணக்கில் எடுத்துக் கொள்ளாதது குறித்து கடும் விமர்சனங்கள் எழுந்த நிலையில் சென்னை உயர்நீதிமன்றம் இத்தகைய கேள்வியை எழுப்பியிருக்கிறது. சென்னை ராஜீவ் காந்தி  அரசு பொது மருத்துவமனையில் அனுமதிக்கப்பட்ட நோயாளி மாயமானது குறித்த வழக்கில் நீதிமன்றம் இக்கேள்வியை கேட்டிருக்கிறது. இதுகுறித்து நீதிபதிகள், ‘தொற்று உறுதி செய்யப்பட்டவர்கள் எங்கெல்லாம் அழைத்து செல்லப்படுகிறார்கள்? எங்கு அனுமதிக்கப்படுகிறார்கள்? என்ற பதிவேடு பராமரிக்கப் படுகிறதா?’ என்று சரமாரியாக் கேள்வி எழுப்பியுள்ளனர்.

தமிழகத்தில் சட்டமன்றம் நடைபெறவில்லை. எதிர்கட்சிகளின் கோரிக்கையை ஆளும் கட்சி செவிமடுக்க தயாராக இல்லை. இந்நிலையில், பாதிக்கப்பட்ட மக்களுக்கு நீதிமன்றங்கள் தீர்வு காண்பது மிகுந்த வரவேற்புக்குரியது.

குவைத் இந்தியர்கள் தாயகம் திரும்ப அனுப்பப்படுகின்ற நிலை ஏற்பட்டுள்ளதே?

உலக நாடுகளில் குறிப்பாக அமெரிக்கா, அரபு நாடுகளில் வேலை வாய்ப்புகளில் தாய் நாட்டிற்கே முன்னுரிமை கொடுக்கும் நிலை ஏற்பட்டுவிட்டது. இச்சூழலில் குவைத் நாட்டிலிருந்து ஏராளமான தமிழர்கள் வேலையை விட்டு தமிழகம் திரும்ப வேண்டிய நிலை உருவாகியிருக்கிறது. குவைத்திலுள்ள 30 லட்சம் வெளிநாட்டினரில் 8 லட்சம் இந்தியர்களை வீட்டுக்கு அனுப்ப குவைத் அரசு முடிவெடுத்துள்ளது.

இந்தியாவில் உள்ள மாநிலங்களிலேயே மண்ணின் மைந்தர்களுக்கு தான் வேலை என்கிற சூழலில் குவைத் உள்ளிட்ட வெளிநாடுகளில் இத்தகைய நிலையேற்படுவது வியப்பு ஒன்றுமில்லை. ஆனால், ஏற்கனவே வேலையில்லா திண்டாட்டத்தின்  உச்சத்தில் இருக்கிற இந்தியாவில் இவர்களுக்கு வேலை வாய்ப்பு வழங்க மத்திய, மாநில அரசுகள் என்ன திட்டம் வைத்திருக்கின்றன?

நில அளவை கட்டணத்தை  40 மடங்கு உயர்த்தி தமிழக அரசு அதிரடி உத்தரவு பிறப்பித்திருக்கிறதே?

நிலம் எல்லை நிர்ணயிக்கும் தொகையை ரூபாய் 50 லிருந்து ரூபாய் 2000 ஆக உயர்த்தப்பட்டுள்ளது. நிலம் உட்பிரிவு செய்வதற்கு 10 மடங்கு கட்டணம் உயர்த்தப்பட்டுள்ளது. கொரோனாவின் கோரப்பிடியில் மக்கள் சிக்கி தவிக்கும் போது தமிழக அரசு சந்தடி சாக்கில் இத்தகைய அதிரடி உத்தரவின் மூலம் விளம்பரம் இல்லாமல் கட்டணத்தை உயர்த்தியிருக்கிறது. இதை விட எடப்பாடி அரசின் மக்கள் விரோத நடவடிக்கைக்கு வேறு சான்று தேவையோ?

சுபசுர குடிநீர், கசாயம், நிலவேம்பு விற்பனை செய்யும் தமிழக அரசின் டாம்ப்கால் மருந்து விற்பனை நிலையத்தை மூடியது நியாயமா?

கொரோனா பாதிப்பிலிருந்து மக்களை மீட்க மத்திய அரசு ஆயுஷ் துறை பரிந்துரை செய்த மருந்துகளை விற்பனை செய்து வந்த சென்னை அரும்பாக்கம் சித்த மருத்துவமனை வளாகத்திலுள்ள டாம்ப்கால் மருந்து விற்பனை நிலையத்தை மூடியிருப்பது பாதிக்கப்பட்ட மக்களை மேலும் கொடுமைப்படுத்துவதாகும். கொரானா தொற்று காலத்தில் நோய் ஒழிப்புக்கு மருந்துகளை வழங்குகிற டாம்ப்கால் விற்பனை நிலையத்தை மூடியதற்கு என்ன காரணம்? இது குறித்து சம்மந்தப்பட்டவர்கள் விளக்கம் கூறுவார்களா? தனியார் மருந்து கடைகளுக்கு அதிக லாபம் ஈட்ட இந்தக் கடை மூடப்பட்டதா? என சிலர் எழுப்புகிற கேள்வியில் நியாயம் இல்லை என்று மறுக்க முடியுமா?

வனத்துறை விசாரணையில் விவசாயி மரணமடைந்தது பல்வேறு சந்தேகங்களை எழுப்பியுள்ளதே?

தென்காசி மாவட்டம், கடையம் அருகே உள்ள ஆழ்வார் குறிச்சி வாகைகுளத்தை சேர்ந்தவர் முத்து. இவர் ஒரு விவசாயி. இவர் வயலில் முள்வேலி அமைத்தது குறித்து வனத்துறை அதிகாரிகள் இவரை  கடந்த புதன் கிழமை இரவு 11.30 மணிக்கு விசாரணைக்கு அழைத்துச் சென்றனர். அதற்கு பிறகு, உடல்நலம் சரியில்லை என்று ஆரம்ப சுகாதார நிலையத்திற்கு அழைத்து சென்ற பிறகு அங்கு அவர் மரணமடைந்துள்ளார். இவரது மரணம் குறித்து அவரது மகள், ‘வனக்காவலர்களின் சித்திரவதையினால் இறந்ததாக’ குற்றம் சாட்டுகிறார். இதுகுறித்து மனித உரிமை ஆணையம் தலைமை வனத்துறை பாதுகாப்பு அதிகாரிக்கு நோட்டீஸ் அனுப்பியிருக்கிறது.

தமிழகத்தில் சாத்தான்குளம் போன்ற காவல் நிலைய மரணங்கள் தொடர்வது அனைவரையும் அச்சத்தில் ஆழ்த்துகிறது. இத்தகைய அவல நிலை நீடித்தால் காவல்துறை, வனத்துறை அதிகாரிகளை கண்டாலே மக்கள் அஞ்சி பதுங்குகிற நிலை ஏற்படுமோ என்ற அச்சம் ஏற்படுகிறது.

The post மோடி ஆட்சியில் தொடரும் ஜனநாயகப் படுகொலைகள்! appeared first on தேசிய முரசு - Desiya Murasu.

ராஜஸ்தானில் துணை முதலமைச்சர் சச்சின் பைலட் தலைமையிலான காங்கிரஸ் எம்எல்ஏக்கள், முதலமைச்சர் அசோக் கெலாட்டுக்கு எதிராக போர்க்கொடி உயர்த்தினர். இதனையடுத்து, அதிருப்தி எம்எல்ஏக்கள் அனைவரும் ஹரியானா மாநிலத்தில் ரகசியமான இடத்தில் தங்கவைக்கப்பட்டுள்ளனர். (ஹரியானா மாநிலத்தில் பா.ஜ.க. ஆட்சி நடைபெறுகிறது).

கடந்த 13 ஆம் தேதி  காங்கிரஸ் சட்டப்பேரவை உறுப்பினர்கள் கூட்டத்துக்கு முதலமைச்சர் அசோக் கெலாட் அழைப்பு விடுத்திருந்தார். இதில் சச்சின் பைலட்டின் ஆதரவு எம்எல்ஏக்கள் கலந்து கொள்ளவில்லை.

இதனையடுத்து, கூட்டத்தில் கலந்து கொள்ளாத சச்சின் பைலட் ஆதரவு எம்எல்ஏ க்களை கட்சி தாவல் சட்டத்தின் கீழ் பதவி நீக்கம் செய்யுமாறு, சபாநாயகருக்கு  காங்கிரஸ் கட்சியின் தலைமை கொறடா பரிந்துரைத்தார். அதனடிப்படையில், இது குறித்து விளக்கம் கேட்டு, சச்சின் பைலட் ஆதரவு எம்எல்ஏக்களுக்கு சபாநாயகர் நோட்டீஸ் அனுப்பினார்.

சபாநாயகரின் நோட்டீஸை எதிர்த்து சச்சின் பைலட் ஆதரவு எம்எல்ஏக்கள் ராஜஸ்தான் உயர்நீதிமன்றத்தில் வழக்கு தொடர்ந்தனர். இந்த வழக்கில் உத்தரவு பிறப்பிக்கும் வரை, எம்எல்ஏக்களை தகுதி நீக்கம் செய்யும் நடவடிக்கையை நிறுத்தி வைக்குமாறு சபாநாயகரை உயர்நீதிமன்றம் கேட்டுக் கொண்டது. ராஜஸ்தான் உயர்நீதிமன்றத்தின் இந்த வேண்டுகோளை உச்ச நீதிமன்றமும் ஏற்றது.

சபாநாயகர் முடிவு எடுப்பதை ஒரு வாரம் தள்ளிப் போடுவது பற்றி பிரச்சினை இல்லை. ஆனால், கட்சி தாவல் சட்டத்தின் கீழ் சபாநாயகர் எடுக்கும் முடிவில் தலையிடும் அதிகாரம் நீதிமன்றத்துக்கு உண்டா? என்ற கேள்வி தற்போது எழுந்துள்ளது.

சபாநாயகரே அதிகாரமிக்கவர். கட்சி தாவல் சட்டத்தின் கீழ் சபாநாயகரின் நடவடிக்கையோ அல்லது முடிவுகளோ நீதிமன்ற ஆய்வுக்குட்பட்டது அல்ல என்று கட்சி தாவல் தடை சட்டத்தில் கூறப்பட்டுள்ளது.

ஆனால், சபாநாயகரின் முடிவு நீதிமன்ற ஆய்வுக்குட்பட்டதே என கடந்த 1992 ஆம் ஆண்டு உச்ச நீதிமன்றம் தீர்ப்பளித்தது. இதன்மூலம் கட்சி தாவல் தடை சட்டத்தின் அடிப்படையே ஒன்றும் இல்லாமல் போனது.

சபாநாயகரின் முடிவுகள் ஆய்வுக்குட்பட்டது என்றால், சபாநாயகர் கட்சி சாராதவராகத்தான் இருக்க வேண்டும். ஆனால், எதார்த்தத்தில் நிலைமை அப்படி இல்லையே. சபாநாயகர்கள் அனைவரும் கட்சி சார்புடையவர்களாகவே இருக்கிறார்கள்.

ராஜஸ்தான் விவகாரம் குறித்து மக்களவையின் முன்னாள் பொதுச் செயலர் டிடி. ஆச்சார்யா கூறும்போது,  ”சபாநாயகர் முடிவு எடுக்கும் முன்பு, அதில் நீதிமன்றம் குறுக்கிட முடியாது. சபாநாயகரின் முடிவை வேண்டுமானால் நீதிமன்றம் மறுஆய்வு செய்யலாம். கட்சி தாவல் தடை சட்டத்தின் கீழ் நடவடிக்கை எடுப்பது பற்றி முடிவு செய்யும் அதிகாரம் சபாநாயகருக்கு மட்டுமே உள்ளது.

ராஜஸ்தான் விவகாரத்தில் சபாநாயகர் முடிவு செய்யும் நடவடிக்கைக்கு உயர்நீதிமன்றம் முட்டுக்கட்டை போட்டுள்ளது.  இது கட்சி தாவல் நடவடிக்கைக்கு தடை விதிப்பதை போன்றது. இது உச்சநீதிமன்றத்தின் முந்தைய தீர்ப்புகளுக்கு எதிரானது. இந்த கட்டத்தில் நீதிமன்ற தலையீடு முற்றிலும் தடுக்கப்படவேண்டும். இந்த வழக்கை ராஜஸ்தான் உயர்நீதிமன்றம் தள்ளுபடி செய்திருக்க வேண்டும். மேலும், தான் அனுப்பிய நோட்டீசுக்கு, நீதிமன்றத்திடம் சபாநாயகர் விளக்கம் அளிக்க வேண்டிய அவசியம் இல்லை” என்றார்.

இது குறித்து சட்ட வல்லுனர்கள் கூறும்போது, ”கடந்த 2017 ஆம் ஆண்டு தமிழக சட்டப்பேரவையில், கட்சி கொறடாவின் உத்தரவை மீறி, அதிமுகவின் 11 எம்எல்ஏக்கள் வாக்களித்தனர். இது அப்பட்டமாக கட்சிதாவல் சட்டத்தின் கீழ் தகுதி நீக்கம் செய்யப்பட வேண்டிய வழக்காகும்.

இந்த வழக்கில் நோட்டீஸ் அனுப்பிய தமிழ்நாடு சபாநாயகர், 11 எம்எல்ஏக்கள் பதில் அளித்த பிறகு, சட்டத்தின் ஓட்டையைப் பயன்படுத்தி அதன் மீது நடவடிக்கை எடுக்காமல் உள்ளார். இது தொடர்பாக வழக்கு தொடர்ந்த போது, சபாநாயகருக்கு காலக்கெடு விதிக்க முடியாது என உயர்நீதிமன்றமும், உச்சநீதிமன்றமும் தெரிவித்தன.

ஆனால், இதே போன்ற வேறு வழக்குகளில் நீதிமன்றங்கள் தலையிட்டுள்ளன என்பதையும் இங்கு சுட்டிக்காட்ட வேண்டியுள்ளது. 11 எம்எல்ஏக்கள் விசயத்தில் சபாநாயகர் முடிவு எடுப்பதற்குள், தமிழக சட்டப்பேரவையின் காலமும் நிறைவு பெற்றுவிடும். இதுபோன்ற நிகழ்வுகளில் நீதிமன்றம் குறுக்கிடாமல் இருப்பது , கட்சி தாவல் தடை சட்டத்தின் நோக்கம் நிறைவேறாமல் போக வழிவகுக்கும்”  என்றனர்.

The post ராஜஸ்தானுக்கு ஒரு நீதி? தமிழகத்துக்கு ஒரு நீதியா? appeared first on தேசிய முரசு - Desiya Murasu.