சுவீடன் நிறுவனத்திடம் சொகுசுப் பேருந்தை லஞ்சமாக பெற்ற மத்திய அமைச்சர் நிதின் கட்கரி : தணிக்கை அறிக்கையில் அம்பலம்

இந்தியாவின் 7 மாநிலங்களில் சுவீடனின் சொகுசுப் பேருந்து நிறுவனமான ஸ்கேனியா வணிகம் செய்ய, மத்திய நெடுஞ்சாலைத் துறை அமைச்சர் நிதின் கட்கரிக்கு பல கோடி மதிப்புள்ள சொகுசுப் பேருந்தை அந்த நிறுவனம் லஞ்சமாகக் கொடுத்துள்ளது வெளிச்சத்துக்கு வந்துள்ளது.

இது குறித்த குற்றச்சாட்டை கடந்த மாதம் மத்திய அமைச்சர் நிதின் கட்கரி மறுத்த நிலையில், சொகுசுப் பேருந்தை அவர் லஞ்சமாக வாங்கியது உண்மைதான் என்பதை, ஸ்கேனியாவின் தணிக்கை அறிக்கை உறுதி செய்துள்ளது.

2014 முதல் 2016 வரை, இந்தியாவில் 7 மாநிலங்களில் பேருந்து ஒப்பந்தத்தைப் பெற, சொகுசுப் பேருந்தை அவர் லஞ்சமாகப் பெற்றதை, சுவீடனின் எஸ்விடி, ஜெர்மனியில் இசட்டிஎஃப் மற்றும இந்தியாவின் தி வயர், காரவன் மற்றும் நியூஸ் லாண்டரி போன்ற இணையதள ஊடகங்கள் ஆதாரத்துடன் செய்திகளாக வெளியிட்டன.

இந்த லஞ்ச பேரத்தில் கட்கரியின் மகன்கள் நிகில் கட்கரி மற்றும் சரங் கட்கரி ஆகியோரது ஈடுபாடு குறித்தும் ஆவணங்களில் தெளிவாகக் குறிப்பிடப்பட்டுள்ளது.

சுவீடன் அரசு தொலைக்காட்சியான எஸ்விடி வெளியிட்ட செய்தியில், ”நிதின் கட்கரி தொடர்புடைய நிறுவனத்துக்கு சிறப்பு வசதிகளுடன் கூடிய சொகுசுப் பேருந்தை சுவீடனின் ஸ்கேனியா மோட்டார்ஸ் நிறுவனம் வழங்கியுள்ளது. இந்தியாவின் 7 மாநிலங்களில் தங்களுக்குப் பேருந்து ஒப்பந்தம் பெறுவதற்காக, இந்த சொகுசுப் பேருந்து லஞ்சமாக வழங்கப்பட்டுள்ளது. இந்த சொகுசுப் பேருந்து கட்கரியின் மகள் திருமணத்தின் போது பயன்படுத்தப்பட்டது” என்றும் தெரிவிக்கப்பட்டது.

ஸ்கேனியா மோட்டார்ஸின் செய்தி தொடர்பாளர் ஒருவர் இது குறித்துக் கூறும்போது, ” இந்த விவகாரத்தில் கடந்த 2017 ஆம் ஆண்டு உள்விசாரணை நடைபெற்றது. லஞ்சம் உள்ளிட்ட தவறான செயல்கள் நடைபெற்றுள்ளன. வணிக பங்குதாரர்கள் மற்றும் சட்டவிரோத பிரதிநிதிகள் மூலம் இந்த லஞ்சம் தரப்பட்டுள்ளது” என்று தெரிவித்தார். எனினும், இந்த விசாரணை அறிக்கை குறித்த முழு விவரத்தை அவர் வெளியிடவில்லை.

இதற்கிடையே, கடந்த செவ்வாய்க்கிழமை விசாரணை அறிக்கை வெளியிடப்பட்டது. அதில் சுவீடனின் ஸ்கேனியா மோட்டார்ஸின் தணிக்கை அறிக்கை இடம்பெற்றுள்ளது. ஸ்கேனியா இந்தியா அதிகாரிகளுக்கும், சுவீடனின் ஸ்கேனியா மோட்டார்சுக்கும் இடையே இது குறித்து நடந்த இமெயில் பரிமாற்றங்கள் இணைக்கப்பட்டுள்ளன. கடந்த 2016 ஆம் ஆண்டு, நாக்பூரில் நடந்த நிதின் கட்கரியின் மகள் கெட்கியின் திருமணத்துக்காக இந்த சொகுசுப் பேருந்து வாங்கப்பட்டதாக ஸ்கேனியாவின் தலைமை செயல் அதிகாரி ஹென்ரிக் ஹென்ட்ரிக்ஸன் உள்ளிட்ட ஸ்கேனியாவின் உயரதிகாரிகள் 3 ஊடகங்களுக்கும் உறுதிப்படுத்தினர்.

ஸ்கேனியாவின் தணிக்கை அறிக்கையில், இந்த சொகுசுப் பேருந்தை நிதின் கட்கரி மற்றும் அவரது மகன்கள் சரங் மற்றும் நிகில் ஆகியோர் கையகப்படுத்தியுள்ளதாகத் தெரிவிக்கப்பட்டுள்ளது. எனினும், கட்காரி குடும்பத்தினர் மற்றும் அவர்களது நிறுவனத்துடனான தங்களது நட்பு குறித்தும், பேரம் குறித்தும் ஸ்கேனியா அறிக்கையில் ஏதும் குறிப்பிடப்படவில்லை.

ஸ்கேன் இந்தியாவும் கட்கரி குடும்பமும் :

சொகுசுப் பேருந்து தொடர்பான பேச்சுவார்த்தை, கட்கரியின் 2 மகன்கள் மற்றும் ஸ்கேனியா இந்தியாவின் விற்பனை இயக்குநர் சிவக்குமார் விஸ்வம் ஆகியோரிடையே கடந்த 2015 ஆம் ஆண்டு ஜூன் மாதம் தொடங்கியது. இதனையடுத்து, 2016 ஆம் ஆண்டு டிசம்பர் மாதம், கட்கரி மகள் திருமணத்துக்காக நாக்பூரில் சொகுசுப் பேருந்து டெலிவரி செய்யப்பட்டது.

இடைப்பட்ட 18 மாதங்களில், பெங்களூருவில் உள்ள ஸ்கேனியா தொழிற்சாலைக்கு சரங் கட்கரி சென்று, அந்தப் பேருந்தை ஆய்வு செய்திருக்கிறார். இதற்கிடையே, அவரது சகோதரர் நிகில் கட்கரி, விஸ்வத்துடன் நேரடியாக பேரம் பேசி முடித்துள்ளார்.

இதனை உறுதி செய்யும் விதமாக, விடபிள்யூ எஃப்எஸ் (வோல்ஸ்வேகன் நிதிநிறுவனம்) நிறுவனம் வெளியிட்டுள்ள செய்தியில், ” அமைச்சராக இருக்கும் பெரிய அரசியல்வாதிக்கு ஸ்கேனியா இந்தியா நிறுவனம் சொகுசுப் பேருந்தைப் பரிசாகக் கொடுத்திருப்பதாகவும், இந்தியாவில் முக்கிய ஒப்பந்தங்களைப் பெறும் நோக்கிலேயே இந்த பேரம் நடைபெற்றுள்ளது” என்றும் தெரிவிக்கப்பட்டுள்ளது. ஸ்கேனியா மோட்டார்ஸிடமிருந்து கட்கரிக்கு அளிக்கப்பட்ட சொகுசுப் பேருந்துக்காக, ஸ்கேனியாவுக்கு ரூ.2.18 கோடி அளவுக்கு வோல்வேகன் நிதி நிறுவனம் கடன் அளித்துள்ளது குறிப்பிடத்தக்கது.

பேரத்துக்கு உதவிய 2 நிறுவனங்கள்:

கட்கரி குடும்பத்தினருக்கும் ஸ்கேனியா இந்தியா நிறுவனத்துக்கும் இடையே பேரம் நடத்துவதற்கு 2 நிறுவனங்கள் பயன்படுத்தப்பட்டுள்ளதாக ஸ்கேனியாவின் தணிக்கை அறிக்கை தெரிவிக்கிறது. கர்நாடகாவில் உள்ள ஸ்கேனியா இந்தியாவின் உள்ளூர் விற்பனையாளர் ட்ரான்ஸ்ப்ரோ மோட்டார்ஸ் பிரைவேட் லிமிட்டெட் நிறுவனம் இந்த சொகுசுப் பேருந்தை முறைப்படி வாங்கி, நாக்பூரைச் சேர்ந்த சுதர்ஷன் ஹாஸ்பிட்டாலிட்டி மேனேஜ்மென்ட் பிரைவேட் லிமிட்டெட் நிறுவனத்துக்கு வாடகைக்கு விட்டுள்ளது.

கடந்த 2016 ஆம் ஆண்டு ஆகஸ்ட் 3 ஆம் தேதி, இந்த சொகுசுப் பேருந்தை கட்கரியின் மகன்கள் இறுதி செய்து, உள் அலங்கார வேலைகளைச் செய்தனர். ஸ்கேனியா இந்தியா நிறுவனத்திடமிருந்து இந்த சொகுசுப் பேருந்தை வாங்க ட்ரான்ஸ்ப்ரோ மோட்டார்ஸ் நிறுவனத்துக்கு வோல்ஸ்வேகன் நிறுவனம் கடன் வழங்கியது. அதன்பிறகு, 2016 ஆம் ஆண்டு நவம்பர் 11 ஆம் தேதி சுதர்ஷன் ஹாஸ்பிடாலிட்டி நிறுவனத்துடன் ட்ரான்ஸ்ப்ரோ மோட்டார்ஸ் வாடகைக்கு விடுவது போன்று ஒப்பந்தத்தில் கையெழுத்திட்டு, நாக்பூருக்கு அந்த சொகுசுப் பேருந்தை அனுப்பியது.

எனினும், இந்த பேருந்துக்கான முழு வாடகையையோ, டெப்பாசிட் தொகையையோ சுதர்ஷன் ஹாஸ்பிட்டாலிட்டி நிறுவனமோ, கட்கரி குடும்பத்தினரோ செலுத்தவில்லை. இதன்காரணமாக, வோல்ஸ்வேகனிடம் வாங்கிய கடனை ட்ரான்ஸ்ப்ரோ மோட்டார்ஸ் நிறுவனத்தால் செலுத்த முடியவில்லை. இதன்விளைவாக, அந்த பேருந்தில் முழு விலைக்கான, கடன் உத்தரவாதத்தை ஸ்கேனியா இந்தியா வழங்கியது. எனினும், இந்த பரிமாற்றம் குறித்த விவரத்தை, ஸ்கேனியா நிறுவனத்தின் சுவீடன் அதிகாரிகளோ அல்லது இந்திய அதிகாரிகளோ தெரிவிக்கவில்லை.

ஸ்கேனியா நிறுவனத்தின் தணிக்கை அறிக்கையில், ட்ரான்ஸ்ப்ரோ மோட்டார்ஸுக்கு வாடகையைச் செலுத்துமாறு கட்கரி மகன்களை ஸ்கேனியா இந்தியா விற்பனை இயக்குநர் பலமுறை கேட்டுக் கொண்டதாகத் தெரிவிக்கப்பட்டுள்ளது. இதன்மூலம், அந்த சொகுசுப் பேருந்துக்கும் மத்திய அமைச்சர் நிதின் கட்கரி குடும்பத்துக்கும் நேரடி தொடர்பு இருப்பது உறுதியாகியுள்ளது.

சுதர்ஷன் குழுமமும் கட்காரிகளும்:

சுதர்ஷன் ஹாஸ்பிட்டாலிட்டி நிறுவனம் கடந்த 2015 ஆம் ஆண்டு ஜூன் மாதம் 9 ஆண் வணிகத்தைத் தொடங்கியது. இந்த நிறுவனம் தொடங்கி ஒரு வாரத்தில் சொகுசுப் பேருந்து குறித்து ஸ்கேனியா மற்றும் கட்கரியின் மகன்களுக்கு இடையே பேச்சுவார்த்தை நடந்துள்ளது. அந்த நிதியாண்டில் எந்த விற்பனையும் நடக்கவில்லை. அடுத்த நிதியாண்டில் ட்ரான்ஸ்ப்ரோ மோட்டார்ஸிடம் இந்த சொகுசுப் பேருந்தை வாடகைக்கு எடுத்ததாக ஒப்பந்தம் செய்து கொள்ளப்பட்டுள்ளது.

வாடகை ஒப்பந்தத்தின்படி, ட்ரான்ஸ்ப்ரோ மோட்டார்ஸுக்கு சுதர்ஷன் ஹாஸ்பிட்டாலிட்டி நிறுவனம் வட்டி இல்லாமல் ரூ.1.2 கோடி அளவுக்கு பாதுகாப்பு டெப்பாசிட்டை செலுத்த வேண்டும். குத்தகை முடிவடையும் 36 மாதங்கள் கழித்து அந்த தொகையை, சுதர்ஷன் நிறுவனத்துக்கு ட்ரான்ஸ்ப்ரோ மோட்டார்ஸ் திருப்பித் தரும். 2016 ஆம் ஆண்டு நவம்பர் மாதம் முதல் 3 தவணைகளாக தலா ரூ. 40 லட்சத்தை சுதர்ஷன் நிறுவனம் செலுத்த வேண்டும் என்பதே வாடகை ஒப்பந்தத்தின் முக்கிய சாராம்சம்.

அதே ஆண்டு, நிதின் கட்கரியின் மகன் சரங் கட்கரி 2016 ஜுன் 15 ஆம் தேதி முதல் முழுநேர இயக்குநராக இருக்கும் மணாஸ் அக்ரோ இன்டஸ்ட்ரீஸ் நிறுவனத்திடமிருந்து, எந்தவித உத்தரவாதமின்றி ரூ. 35 லட்சத்தை சுதர்ஷன் ஹாஸ்பிட்டாலிட்டி நிறுவனம் பெற்றது. மணாஸ் குழுமத்தின் ஒரு நிறுவனம் தான் மணாஸ் அக்ரோ. மணாஸ் குழுமத்தில் ஆலோசகராகவும், நிர்வாக கவுன்சிலின் உறுப்பினராகவும் நிகில் கட்கரி இருக்கிறார் என்பது குறிப்பிடத்தக்கது.