புவியோடிப் படர்ந்ததிருக்கும்

நவகோடித் தமிழினமே

கார்மேகமாய் வாழ்ந்த காமராசா

கவிபாடி வணங்கினேன் கர்மவீரா 

❈

ஒப்பாரும் மிக்காரும் இல்லாத

உன்னதத்தின் பிதாமகன்.

ஊசியால் இமயத்தை நெம்பிய 

உள்ளங்கையின் மகத்துவம்.

❈

ஆடுமாடு மேய்த்த அரும்புகளை

ஏடு படிக்க வைத்த எம்பெருமான்.

வயிற்றுக்கு சோறிட்டு வகைசெய்து

பயிற்றிக் கல்வி தந்த பகலவன்.

❈

தீண்டாமைப்பேயை தீயில்பொசுக்கி,

ஊரார் பிள்ளைகளை ஒன்றாக்கி,

பாசறையாக பள்ளிகளை ஆக்கி

சமதர்மம் நாட்டிய சாதனையாளன்.

❈

ஊர்கள்தோறும் பள்ளிக் கூடம்

உதயமானது புதிய சமூக பாடம்.  

கண்கள் திறந்தன! காலம் மாறின!

புண்கள் ஆறின! பூசல் போயின!

❈

கல்லாமை இல்லாமை அறியாமை

காணாமல் செய்த கலங்கரை விளக்கு.

பாசனத்திற்காக பற்பல அணைகள்

தேசம் வாழ செய்தொழிலே கணக்கு.

❈

படிக்காமல் பாராண்ட பாரதத் தீ!

வெடித்தால்தான் பாறைவாய் திறக்கும்

விதைத்தால்தான் புதியவிதை கிடைக்கும்.

விதைக் கோட்டை ஆன வித்தகன்.  

❈

கருப்பு தேகத்தில் ஒரு நெருப்பு நிலா

உருவத்தில் ஒளிர்ந்தது உழைப்பு உலா

காமராசர் காலம் கொடுத்த நிழல்

தமிழ்மண்ணின் ஏமம்படைத்த அழல்

❈

ஆதிக்கங்களை முறியடித்த சூத்திரம்.

அரசியலில் இவரே துருவ நட்சத்திரம்.

ஆட்சியில் ஒளிர்ந்த எரிநட்சத்திரம்.

ஆண்டவர்களில் வரலாற்றுச் சித்திரம்.

❈

சமுதாய மேடுபள்ளத்தை உழவு செய்து

சாதிகளின் ஆதிக்கத்தை பழுது பார்த்து

ஆட்சிக்கு இலக்கணம் வகுத்த அறிவுஜீவி.

மக்கள் மீட்சிக்கு மருந்தான சஞ்சீவி

❈

அழிபசி தீர்த்தலின் அவசியத்தேவை

உற்றுழி உதவி உயர்த்திய மேதை

அசுரப்பாய்ச்சலில் பாசனம் தொழில்கள்

உசரம் தொட்ட உயரிய தலைவன்

❈

இலக்குகள் நோக்கிய திட்டங்கள்

இன்றைய  தமிழகத்தின் கட்டகங்கள்.

நெடுநோக்கில் இமயவெற்பு

தடம்பதித்த தமிழக நெருப்பு.

❈

நேர்மையே இவரது தேசிய கீதம்  

சொல்றேண்ணேன் என்ற சொல்மேகம்

“ஆகட்டும் பார்க்கலாம்” இது ஆயுர்வேதம்

தனக்கென வாழாத தலைமைக் கீதம்

❈

முழங்கால் தொடும் சட்டை பிறர்

முழந்தாள் தொடாத தன்மானம்.

ராசாக்களை உருவாக்கிய ராசா

பெருந்தலைவரான கருப்பு ரோசா.

❈

தொண்டுக்குத் தொண்டான தலைவன்.

பொன்னை பெண்னை விடுத்து

மண்ணை மணம் செய்த பீஷ்மன்.

வான் மழையாய் வாழ்ந்த முதல்வன்

❈

இந்தியத்தின் இதயத் துடிப்பு.

ஏழைகளின் நாடித் துடிப்பு.

தமிழினத்தின் எளிய படைப்பு.

தமிழக அரசியலில் புதிய பதிப்பு.

❈

இல்லானும் கல்லானும் எவருமில்லை

மனிதப் பூ மலர வைத்த மானுடப்பூ.

இந்தியாவின் ஆன்மாவுக்கு குறியீடு.

எந்நாளும் வரலாற்றின்  பொன்னேடு.

The post பெருந்தலைவா பிரியமான வாழ்த்து… appeared first on தேசிய முரசு - Desiya Murasu.